Astearte honetan Ongizate Estatuaren krisialdia aztertzen duen erreportajea eskainiko da ETB-1en Ertz-ertzean izenburupean, oinarrizko eskubideak bermatuta ez izateak dakartzan ondorioak jorratuko dituzte bertan.

Europan Ongizate Estatuaren oinarriak XX mendeko erdialdean ezarri ziren. Hasierako helburua herritarren eskubide sozialak eta laboralak bermatzea izan zen. Baina helburu honek ez zuen denbora luze iraun.

Gaur egun, osasuna, hezkuntza, lana, etxebizitza eta beste hainbat oinarrizko eskubide kolokan daude. Eskubide horiek bermatuta ez izateak gure eguneroko bizitzan ezegonkortasuna eta prekaritatea nagusitzea dakar.

Bizitza erosoa segundu batetik bestera galdu dezakegu, pauso txiki bat besterik ez dago ondo bizitzetik gaizki bizitzera. Erreportajean parte hartu duten hiru protagonistek urrats hori eman dute. Txipik, bi seme izanda, bi hilabete daramatza langabezian. Lourdesek berriz, alargun geratu eta lanean jartzeko beharra izan du. Javier orain dela hiru urte banatu zen, eta banaketak kolokan jarri zuen zeraman bizitza erosoa.

Igor Uriarte eta Maixan Alberbide gai sozialetan adituen laguntzaz, Ertz-ertzean bizitzea zer den ezagutzeko aukera izango da gaueko 23:00etan ETB-1en.