Dynamo taldeak irabazi du Gaztearen XVII. Maketa Lehiaketa. Aditu talde batek osatutako epaimahaiak www.gaztea.com-en zintzilikatutako 437 kantak entzun ditu eta, haien ustez, aurkeztu diren 130 talderen artean getxotar hauek dira guztietatik onenak. Entzuleen sariaren garaileak ere bizkaitarrak dira: Zaldibar eta Berrizko lagunek osatzen duten Noisex taldea.

 “Birds” abestiarekin irabazi du Dynamok maketa lehiaketa. Epaimahaiaren iritziz, talde honen musika egungo rockaren primerako erakusgarri da eta 90. hamarkadako soinua ekartzen du gogora, hori bai, momentuko egonezin eta dinamismotik abiatuta. 3.000 euroko diru-saria, 6.000 euroko aurrekontua izango duen bideoklipa eta Bilbao Live jaialdian parte hartzeko aukera irabazi ditu.

Dynamo taldea 2007ko urtarrilean jaio zen eta lau lagunek osatzen dute: Antonio (gitarra, teklatua, ahotsa), Javi (baxua, ahotsa), Paco (gitarra, ahotsa) eta Kike (bateria). Rock freskoa eta egungoa egiten dute, 90ko hamarkadako kutsuarekin. Incubus eta Smashing Pumpkins bezalako taldeen eragina sumatzen zaie.

Entzuleen sariari dagokionez, berriz, Gaztea.com-era igotako kantu guztien artean Internet, telefono eta SMS bidez boto gehien jaso duen taldea Noisex (Zaldibar-Berriz) izan da botoen %18,74ekin. Bigarren, From Lost To The River (Amurrio) sailkatu da botoen %15,66ekin eta hirugarrena Marvin (Iruña) izan da botoen %10,54 lortuta. Noisex talde irabazleak 1.500 euroko saria eskuratu du.

 Euskal Herriko musika munduan oihartzun handia du Euskadi Gazteak Eusko Jaurlaritzako Kultura saileko Gazteria Zuzendaritzaren laguntzaz antolatzen duen Maketa Lehiaketak, eta ohikoa izaten da irabazleek diskoetxe batekin kontratua sinatzea. Halaxe izan da, besteak beste, EH Sukarra, Sorotan Bele, Pilt, Zea Mays, Seiurte, Kerobia eta Kauta taldeen kasuan.