Azken bost urtetan mileuristen kopurua %33tik %41ra igo da Hego Euskal Herrian. Gainera, abendutik urtarrilera langabeziak gora egin du %9,4 eta 9.000 langabetu gehiago zenbatu ditu INEMek. Gai horri astindu bat ematen saiatuko dira "Kalaka"n, asteazkenean, 22:00etan, ETB-1en.

Gazte gero eta prestatuagoak, master eta graduondokoekin, mila eurotako soldatak baino ez dituzte irabazten. Zein da honen errudun? Enpresariena ote da erantzunkizuna? Zeresanik ba al dute sindikatuek fenomeno honen aurrean? Gauzak dauden moduan, klase sozial berri batez hitz egin al dezakegu? Mileuristek talde kontzientzia hartu behar al lukete eta haien egoera hobetzearen alde denak batera lan egin?

Enpresaren mundua, sindikatuena eta unibertsitatearena islatuta izango dira Xabier Euzkitzek aurkezten duen saioan: Jose Mari Ulazia hezkuntza munduan aditua, Aitziber Oliban EGIko kidea, Ritxi Aizpuru musika editorea, Xabier Aierdi soziologoa, Iñigo Almortza tratante eta kotxe saltzailea, Garbiñe Aranburu LABeko kidea eta Igor Mera Gazte Kontseiluko etxebizitza teknikaria izango dira mahaian.

Iñigo Agirre, bestalde, Lehendakaritzako egoitzan izan da Emakundek bere 20. urteurrena ospatzeko antolatu duen ekitaldian. Bertan bildutakoei orain arte egindako lanaz eta etorkizunaz galdetuko die “Kalakako” erreportariak.