Asteburuetan euskal gazteak nola dibertitzen diren jakin nahi izan du ETBko lan-talde batek eta horren berri ekarriko digu astearte gauean ikusgai izango den Gaua Asmatzen dokumentalak. 23:10ean emitituko da K-2000 etxearen ekoizpen berri hau, “Goenkale” telesailaren ostean.

Asteburuero 175.000 gazte ateratzen dira gauez Euskal Autonomia Erkidegoan. Estatu osoan 3 milioi dira. Gauak aukera ezberdinak jartzen ditu gazte hauen esku. Gazteen %70ak giroa da bilatzen duena, %60ak monotoniarekin haustea eta % 54a askatasun sentimenduaren eta abenturaren bila ateratzen da.

Erreportaje honen bidez gauetan egoten diren plan eta giro ezberdinak ezagutu eta ezagutarazi nahi izan dituzte. Lan honetarako gauean aditua den Unai Goikolea DJa izan dute gidari.

Berarekin Bilboko taberna eta diskoteka ezberdinetatik ibili dira: Amor de Madre, La Tramoya, Badulake eta Fever dira bisitatu dituzten taberna edo diskoteka batzuk, guztiak ere eskaintza ezberdin eta bereziarekin.

Unai Goikolearen eskutik etxean antolatutako after batean egoteko aukera ere izan dute, youtubeko bideoak, alkohola eta ligoteoa nahasten diren jai horietako batean.

Baina gauaren alde iluna ere ezagutu nahi izan dute, alkohola, droga eta kotxea nahasten dituztenena. Horretarako Ertzaintzarekin batera alkohol eta drogen kontrol batera joan dira. Kontrol horietan erabiltzen dituzten sistema berriak ikusteaz gain, positiboa eman dutenen hitzak ere jaso ahal izan dituzte.