Minbiziari helduko dio astearte honetan ETB-1ek eskainiko duen dokumental bereziak. Gaitza eta bizitzeko nahia aurrez aurre jarriko dira erreportajea osatzen duten protagonisten testigantzetan. Ama, aita, seme, alaba edota senarra, gaixotasunaren inguruan dauden guztiak bilakatzen dira gaitzaren eraginen isla eta horren lekuko izango dira ikus-entzuleak Minbizia...Bizimina dokumentalean, gaueko 23:05ean.

Bularreko minbizia emakumeek gehien pairatzen duten tumore gaiztoa da, heriotza-tasarik handiena duena. Azken hamarkadetan minbizi kasuak gehitu egin dira, eta gero eta adin gazteagoetan azaltzen dira. Zortzi emakumetik batek bularreko minbizia izateko arriskua du.

Bularreko minbizia dutenetan, %1 baino ez dira gizonezkoak. Hori dela eta, emakumeen gaixotzat hartu izan da urteetan. Hala ere, edonor izan daiteke hurrengo diagnostikoaren protagonista. Gaitzari aurre egiteko programa berriek eta aurrerapen medikoek heriotza-tasa gutxitzea ekarri dute. Gero eta gehiagok irabazten dute bizitzako borroka hau.

Prebentzioa da aurre egiteko neurririk eraginkorrena. Hala ere, polemika piztu da prebentzio programen inguruan. EAEko Osasun Saileko Diagnostiko Goiztiarraren adin tarteek, esaterako, ez dute denen nahia asetzen. Bularra kentzea, amatasuna, feminitatea... Nahitaez emakumetasunaren esentziarekin zuzenean lotzen den gaitza da.

Besteak beste, hitz hauen guztien atzetik gordetzen diren bizipen eta sentimenduak emango dituzte ezagutzera Minbizia... bizimina dokumentalean, gaitza bizitakoen ahotik. Gurutzetako Onkologia Saileko Nerea Anzizar medikuak gaitzaren alderdi teknikoa azalduko du.