Aurtengo denboraldian “Goenkale” telesailak 2.500 atal bete ditu eta gertaera garrantzitsu hori atal berezi batekin ospatuko dute Eguberri egunez. Gabon jaiak direla aprobetxatuz, telesaileko egungo eta lehengo aktoreak elkartuko dira Arralden. Guztiek elkarrekin, Boga tabernaren 25. urteurrena ere ospatuko dute, Jose Mari estimatua gogoan, jai handi bat antolatuko baitu Maria Luisak.

Aspaldiko lagunak hurbilduko dira Arraldera Eguberri jaietan: Eusebio (Pedro Otaegi), Margari (Maite Bastos), Hortentsi (Arantxa Gurmendi), Nelson (Carlos N´Guema), Guti (Gorka Igartua), Lutxi (Itziar Urretabizkaia) eta Txapas (Jose Mari Berasategi). Iraganeko kontuak ekarriko dituzte gogora, elkarrekin bizitako une gazi-gozoak, bihotzean gordeta dituzten pasadizoak... Eguberri eguneko ospakizunak horretarako aukera eskainiko die eta, bide batez, Boga tabernaren 25. urtemugarekin bat egingo dute.

EITBk 25 urte bete dituen urtean iritsi da “Goenkale” 2.500. atalera, telesailaren 14. denboraldian, hain justu. Gertaera hori ere kontutan izango dute Eguberri eguneko atal berezi honetan. 1982ko abenduaren 31an, telebista lehen aldiz aireratu zeneko unea, Hortentsi, Margari, Maria Luisa, Eusebio eta Jose Marik nola bizi izan zuten erakutsiko dute.

Ordu eta erdiko atal berezia izango da abenduaren 25ean ETB-1en ikusgai izango dena, eta bi egunetako gertaerak kontatuko ditu. Lehen egunean Eguberri jaia ospatuko dute eta bigarrenean, berriz, Bogaren urtemuga. Festa erraldoia antolatuko du Maria Luisak Jose Mari zenarekin zabaldutako tabernaren omenez. Lehengo eta oraingo lagunen topagune izango da, eta guztiek elkarrekin dibertitzeko eta ondo pasatzeko aukera izango dute. Txapasek striptease bat ere egingo du.

Jai giroan murgilduta, ohiko pertsonaien gorabehera berriak ere ezagutuko dituzte ikus-entzuleek. Hala, Mirarik eta Josuk ustekabe desatsegina prestatuko dute Agurtzanerentzat. Alazne Pelloren emazte ohia gonbidatuko dute Eguberri eguneko bazkarira eta tentsio uneak biziko dira. Leonor, bere aldetik, triste ikusiko dugu; Koldo jada ez dago berarekin eta Milena ospitalean dago. Baina Lutxi, Txapas eta Nelsonekin elkartzeak asko poztuko du. Leonor berak eta Mimik ere bai, atsegin handiz hartuko dute Nelson herrian eta aspaldiko sentimenduak biziko dituzte mutilarekin.

Atal bereziaren amaieran, pertsonaia guztiek Gabon kanta hunkigarri bat eskainiko diete ikus-entzuleei.