Aste honetan ONA (Online News Association) kazetarien Elkarteak zortzigarren Kongresua izan du Toronton (Kanada), eta eitb24.com-ek parte hartzeko aukera izan du.

Kazetaritzako eta Interneteko kazetaritza negozioko azken joerak argi gelditu dira bilera horretan. Hala, bertakoa (baita hiperbertakoa ere) eta erabiltzaileek egindakoa, eurentzat egindakoa eta eurekin egindakoa izan dira gai esanguratsuenak.

Hilary Schneider, hain zuzen, izan zen hasierako hitzaldia esatearen arduraduna. Yahoo!-ren bertako merkatuetara zuzendutako negozio-unitate berria ere aurrera eraman zuen Schneiderek duela urte bat. Europan Yahoo! ez dela asko erabiltzen esan beharra dago, baina Amerikako kontinentean bai, ikaragarrizko eduki atari gisa, batez ere.

Schneideren arabera, merkatu horiek sustatu beharra dago, baita erakunde global handietatik ere. Eman duen amaierako mezua berrikuntzaren aldekoa izan da erabat: Gaurko berrikuntzek biharko buruzagi digitalak sortuko dituzte.

Ez gara ardiak

Beste gai nagusia herritarrek egindako kazetaritza eta, orokorrean, 2.0 webarekin eta erabiltzaileek sortutako edukiekin zerikusia duen guztia izan da. Horretara etorri da, besteak beste, Dan Gillmor. Askok eta askok herritarrek egindako kazetaritzaren kontzeptuaren “aitatzat” jo dute Gillmor.

Gillmoren hitzetan, “erabiltzaileak ez gara artzain bat behar duten ardiak: Hitz egin nahi duen jendea gara. Hori da komunitateak sortzeak duen balio handia, jendeak, gehienbat, nahi duena egiten duelako, eta hori da balio duena”.

Eta “mandatu” bi utzi zituen betiko hedabideentzat:

1) Batzutan iruzkinak edukia baino interesgarriagoak izan daitezke; iruzkin horiek moderatu beharra dago, eta baliteke adibiderik onenak kazetaritzako gaurkotasunean ez egotea.

2) Ireki ezazu zure webgunea, jarri itzazu beste tokietarako estekak, permalinkak… soziala izan zaitez.