Udako oporren ostean, "Sautrela" literatura saioa asteburu honetan itzuliko da larunbateko bazkalostera ETB-1en eskutik. Hasier Etxeberriak 14:40etik aurrera gidatzen duen saioak, literaturari ez ezik, letrei zein liburuei ere arreta berezia eskainiko die.

Hamaseigarren denboraldi honetan badute zer ospatu "Sautrela"n. Ikasturte berri honetan 200. saioa egingo dute eta azaroaren 3an programa berezi batekin ospatuko dute.

Euskal idazleentzako plaza izateaz gain, "Sautrela"k munduko idazleei lekutxoa egin asmotan jarraituko du. Hori horrela, denboraldi berri honetan, udazkenean argitaratuko diren liburuen eta idazleen berri emango dute.

Erreportaje eta elkarrizketekin batera, munduko bazterretako literatur pitxiak zein Iñigo Aranbarriren eta Anariren irakurketa hautatuez gozatzeko aukera luzatuko du ETB-1eko saioak.

Lehen saioa urriaren 6an emitituko da. 196. atala izango da eta honako osagaiak izango ditu: alde batetik, erreportajean, nobelen hasierak aztertuko dituzte eta, bestetik, elkarrizketaren atalean, Xabier Amurizari egingo diote lekua. Amurizak urriaren azkenetan argitaratuko duen nobelaz hitz egingo du.

Hasier Etxeberriaren gidaritzapean, Xabier Gantzarain eta Jon Benito arituko dira gidoilari lanetan. Errealizazioan, berriz, Guille Sanchez eta Maialen Sarasua egongo dira, eta produkzioan Nagore Olkoz.

"Sautrela" larunbatero emango da Euskal Telebistako lehen katetik 14:30ak aldera.