Euskal Telebistak “Pilotari” telesail berria estreinatuko du laster. 13 ataleko ekoizpen honek Julen Gortari pilotari gaztearen bizipenak dakartza.

Iñigo Aranbarri dugu protagonista nagusia eta berarekin batera, punta-puntako aktoreak arituko dira: Joseba Apaolaza, Lierni Fresnedo, Asier Hormaza, Koldo Losada eta Iñaki Beraetxe, besteak beste. Igande gauero izango da ikusgai, ETB-1en, ordutegi nagusian.

Julen Gortari pilotari gaztea Euskal Herrira dator Venezuelatik. Bost urte eman ditu bertan preso, Rodeoko kartzelan. Euskal Herriko pilota federazioarekin partida batzuk jokatzera joan eta etxerako bueltan, Caracaseko aireportuan, aduanako poliziak drogaz betetako poltsa bat aurkitu zuen Julenen ekipajean. Kartzelan, ahal duen moduan eraman du bere bizitza aurrera, El Vasco ezizenaz ezaguna den jatorri euskalduneko gizon baten babesean. Saiatu bada ere, ezin izan du frogatu droga poltsa hura ez zela berea, norbaitek sartu zuela bere maletan.

Gertakari lazgarri honetatik abiatuta garatuko dira telesail honetako trama nagusiak. Etxera itzultzean hautsitako familia bateratzen saiatu beharko da Julen. Etorkizun handiko pilotaria zen eta lehengo kirol bizitza berreskuratu nahiko du. Alabaina, hainbat oztopo eta ezintasun aurkituko ditu bidean.

Kartzelatik irtetean diruz betetako gutunazal bat jaso zuen eta herrira bueltatzean jakingo du gutuna ez zela familiak igorritakoa. Bestalde, iritsi eta berehala, dei misteriotsu bat jasoko du. Bere ekipajean agerturiko droga poltsaren arduradunaren bila hasteko pista bat emango dio.

Maitasun istorio bat ere biziko du protagonistak. Etxera bidean, Madrildik Euskal Herrirako tren bidaian, neska bat ezagutuko du, Ainhoa. Bat-bateko maitemina piztuko da bien artean, laster lan harreman bat izango dutela jakin gabe.

3Koma eta Baleuko ekoiztetxeek elkarlanean egindako telesaila Miramonen grabatu da, ekainean inauguratu zen 1.200 m2ko plato berrian. Eurak izan dira platoa erabiltzen lehenak, hain zuzen. Kanpoko irudiak, berriz, Hernanin grabatu dira batez ere.

Emilio MacGregor da zuzendaria eta bere esanetara aritu dira, Iñigo Aranbarri protagonistarekin batera, aktore ezagun asko: Joseba Apaolaza, Lierni Fresnedo, Asier Hormaza, Koldo Losada, Iñaki Beraetxe, Maitena Salinas, Amane Ibañez, Paul Navarlaz, Jose Antonio Bengoetxea, Pedro Otaegi, Ivan Malo, Matxalen de Pedro, Karmele Aranburu, Xabi San Sebastian, Aintzane Gamiz, Xabi Ortuzar, Erik Probanza, Iratxe Urkiaga, Urki Muguruza, Ekain Arrieta eta Iñaki Esnaola.