“Date el Bote” saioak zazpigarren denboraldia abiatuko du astelehenean, irailak 3. Carlos Soberak gidatzen duen lehiaketa irudi berriarekin itzuliko da programaziora, ohiko ordutegian, 14:00etan.

Laster, www.eitb.com webgunean tartetxo bat izango du, gainera.

Hilabete honetan 1.300garren atalera iritsiko den lehiaketak orain arteko egiturari eutsiko dio: hamar lehiakide, bost mutil alde batetik eta bost neska bestetik, arituko dira nor baino nor, astelehenetik ostiralera. Carlos Soberak egingo dizkien galderei erantzunez, ostiraleko zakua irabaztea izango dute helburu.

Sei urteotan, bi milioi euro baino gehiago banatu dituzte saritan, 2.172.270 zehazki. 2.500 lehiakide baino gehiago hartu dituzte platoan eta 200.000 galdera inguru egin dituzte.

Denboraldi berrirako irudia goitik behera aldatuko dute. Platoko dekoratuan, irudi grafikoan eta lehiaketan ohikoak diren mugimenduetan sumatuko ditugu aldaketak.

Bestalde, saioak web orria izango du laster http://www.eitb.comen. Bertan, “Date el Bote”n parte hartzeko eta publiko bezala joateko argibideak emango dituzte. Denboran atzera egin eta bideo historikoak ikusteko aukera ere eskainiko du. Aurkezleak eta lehiakideek egindako hanka sartzeak erakutsiko dituzte, plano putzak eta zaku potoloenak banatu direneko irudiak ere bai.

Jolasteko aukera ere eskainiko da lehiaketa birtualaren bidez. Telebistako platoan egongo balitz bezala, internautak “Date el Bote”ko galderak erantzun beharko ditu. Bide batez, lehiaketa prestatzen aritzen diren gidoilariekin hartu-emanean egoteko aukera izango dute. Galderak bidali ahal izango dituzte eta beharbada Carlos Soberak euren izena aipatuko du grabazioan.