Estitxu Fernandez genuen orain arte emakume aurkezle bakarra. Aurrerantzean, baina, Ana Ramos izango du lagun. Eurekin batera arituko dira berriemaile Xabier Usabiaga, Mikel Olazabal, Jon Elortza, Jose Ituarte eta Asier Aranguren. Talde sendoa osatuta, denboraldi berriari ekiteko prest dira. Asteburu honetan dute lehen hitzordu nagusia. Futbol Liga txapelketa hasiko da eta horrekin batera, “Kirolez Kirol” eta “El Derby” saioak ETBko programaziora bueltatuko dira.

Ohi denez, “Kirolez Kirol”ek hiru edizio izango ditu: larunbat arratsaldekoa, Mikel Olazabalek gidatuta; igande goizekoa, Xabier Usabiagarekin, eta arratsaldekoa, Jon Elortzarekin. Jose Ituartek aurkeztuko du, orain arte bezala, “El Derby” saioa igande iluntzetan.

Euskal Telebistako kirol programazioak ohiko egiturari eutsiko dio, eta "Gaur Egun" eta "Teleberri" albistegiek ere kirol berriemaileak izango dituzte. ETB-1en, igandetik asteazkenera Xabier Usabiaga arituko da eta ostegunetik larunbatera Estitxu Fernandez. ETB-2n ere bi aurkezle txandakatuko dira: Asier Aranguren igandetik asteazken eguerdira eta Ana Ramos asteazken gauetik larunbatera.

Aurkezle guztien artetik estreinakoz arituko dena Ana Ramos izango da. ETBko kirol erredakzioan 11 urte egin ditu lanean eta beraz, ikus-entzuleari ez zaio arrotza egingo bere izena. Eibarren jaio eta Algortan bizi den kazetaria Osasuna taldearen berriemailea izan da zazpi urteotan ETBn, talde nafarra Lehen Mailara igo zenetik. Iragan ikasturtean, Radio Euskadiko “Graffiti” saioko kirol solasaldian ere entzun ahal izango dugu astelehenero. Gogotsu ekingo dio egiteko berriari.

Bigarren Mailako futbola, larunbatero, zuzenean

Larunbateko “Kirolez Kirol” saioak Bigarren Mailako futbola eskainiko du larunbatero zuzenean. Denboraldiko lehen emankizunean, Eibarrek Racing Ferrol taldearen aurka jokatuko duen neurketa izango da ikusgai. Kategoria honetan arituko diren beste bi euskal taldeak, Alaves eta Reala, zuzenean jokatzen ikusteko aukera ere izango dute ikus-entzuleek.

Halaber, Lehen Mailan gertatzen den guztia adi-adi jarraituko du “Kirolez Kirol” saioak. Larunbatetan, aurreratutako partiden laburpenak eskainiko dituzte eta igande gauetan, jardunaldiak eman duena zehatz-mehatz aztertuko dute. Asteburu honetan tarte zabala eskainiko diote igandeko Athletic-Osasuna derbiari.

Igandean, “El Derby” saioak minutuz minutu jarraituko du Lehen Mailako bi euskal ordezkarien arteko neurketa interesgarria. Bestalde, bezperan Realak, Alavesek eta Eibarrek jokatutako partiden laburpenak eta protagonisten hitzak eskainiko dituzte .

Jose Ituartek gidatzen duen programak ohiko egiturari eutsiko dio eta Los minutos de oro tartean jardunaldiko golak eta 2007-2008 denboraldiko izarrei buruzko bideoak eskainiko ditu astero. Beste taldeetan diharduten jokalari euskaldunen berri emango dute eta eztabaida sortu duten jokaldien azterketa egingo dute Joaquin Urio arbitro ohiarekin.

Estropadak eta pilota ere bai, asteburu honetan

Asteburu honetako kirol eskaintza osatzeko, estropadak eta pilota emanaldiak eskainiko ditu ETB-1ek. San Miguel Ligaren 13. eta 14. jardunaldiak jokatuko dira larunbatean Laredon arratsaldeko bostetan eta igandean Orion eguerdiko 12etan, eta “Kirolez Kirol”ek zuzenean eskainiko ditu. Igande arratsaldean, berriz, Errioxako Ribafrecha herrian ospatuko den pilota jaialdia izango da ikusgai bostetatik aurrera. Atariko partidan Del Rey-Merino I eta Cabrerizo-Apeztegia bikoteak izango dira aurrez aurre. Estelarrean, berriz, Titin III.a eta Galarza VI.ak Capellan eta Barriolaren aurka neurtuko dituzte indarrak.