Julian Schnabel ezaugarri anitzeko artista izango da "EiTB Kultura" saioko protagonista aste honetan. Donostiako Tabacalera eraikinaz liluratuta dago New Yorkeko sortzailea. Bertara ekarri duen "Summer" erakusketaren bitartez, zinegile, eskultore eta margolari hau hobeto ezagutzeko parada izango dute "EiTB Kultura" saioko ikus-entzuleek.

Erratzak, zakarrontziak, zartagin edo kazolak; plastikozko bidoiak, baita poxpoloak ere. Edozerk balio dezake erraz gogoratzeko moduko erritmoak sortzeko. Horixe da Stomp taldearen filosofia. Britainia Handiko konpainiak 15 urte daramatza bere ikuskizuna mundu osoko antzokietan erakusten. Orain, Bilboko Aste Nagusian ikusiko ditugu.

Azkena Rock Festival musika jaialdi erraldoia gainean dugu. Gasteizkoa Estatuko rock jaialdirik garrantzitsuenetakoa dugu. Euskal Herriko ordezkaritza osatuko duten bi taldeak Las Furias eta Sexty Sexers dira. Egiten duten musikaz eta jaialdiaz mintzatuko dira eurekin "EiTB Kultura"koak.

"Errenteriako atea" izeneko eskulturak ongi-etorria ematen du herriaren sarreran. Iñaki Ruiz de Eguino, Europako artista geometriko garrantzitsuenetakoa, da egilea. ETBko kamerak bere estudioan sartu dira.

Bilboko Rekalde Aretoan Sean Snyder Ipar Amerikako artistaren erakusketa bisitatu daiteke egunotan, bere proiektu berrienekin. Irakeko gerra gai nagusi hartuta, komunikabideek erakutsitako jarrerari buruzko hausnarketak dira.

Bestalde, barkuan ibiliko dira, Donostia itsas-hirian murgilduko dira, hain zuzen. Hiriburuko Ontzi Museo berrituan sartu-irtena egingo dute saioko kamerek.

Marmola, brontzea, burdina edo beruna. XX. mende hasierako eskulturak, marrazkiak, prestaketa kartoiak eta bitxiak, Pablo Gargalloren sinadura duten 88 obra. Aragoiko artistaren pieza abstraktuak zein figuratiboak Kursaalen aurkituko ditugu. Modernismoak eta kubismoak eraginda, hutsunearekin jolasak lortzea eta bolumenak azpimarratzea lortu zuen Gargallok.

"EiTB Kultura" asteartean izango da ikusgai ETB-2n, 00:30ean eta ostegunean ETB-1en, 00:15ean.