Igandean, abuztuak 5, Euskal Telebistako lehen kateak "Itsasontzi baten..." programaren atal berria eskainiko du 21:20ak aldera.

Orain arteko saioetan, Ness Lakua gurutzatzeko prestatzen aritu da Jose Luis Korta. Eta azkenean, heldu da momentua. Batela furgoneta gainean jarri, mapa eskutan hartu eta Eskoziarako bidea hartu du gure patroiak bere semea, Alex, lagun duela.

Santurtziko portutik, itsasontziz abiatuko dira aita-semeak britainiar lurraldeetara. Itsasoa ongi baino hobeto ezagutzen dute biek, baina bidaia honetan aurkituko duten lehen arazoa hizkuntza izango da. Imajinatzen al duzue Korta ingelesez?

Horrez gain, abentura honetan, bi protagonistek ordu asko igaro beharko dituzte elkarrekin, eta beraien arteko eztabaida, haserre eta liskarren lekuko izango dira ikus-entzuleak. Izan ere, aski ezaguna da nolakoa den Kortatarren jenioa.

Portsmoutheko portura iristean, beste arazo batekin egingo dute topo. Ingelesek kontrako bidetik gidatzen dute eta komeriak izango dituzte furgonetan ezkerretik ibiltzeko. Traineruaren norabidea inork baino hobeto menperatzen du Kortak, baina lehorrean bere orientazioa oso bestelakoa da. Eskerrak alboan Alex semea duen, beti bere aitari laguntzeko prest...