Urtero legez, aurten ere euskal zaleekin egon da Euskal Telebista Frantziako Tourrean. Oraingo honetan, Julian Iantzik aurkeztuko du ETB-1eko erreportaje berezia iluntzeko 22:00ak aldera.

Uztailaren 23an Peyresourde gaineko giroa jasoko dute "Zaleon Tourra 2007" programan. Bertan, zale mordoa elkartuko da lasterketako euskal txirrindulariei animuak emateko. Euskal Herri osotik gerturatutako jarraitzaileekin egoteaz gain, Tourrean protagonistak diren kirolariekin beraiekin ere solastatuko da Julian Iantzi.

Uztailaren 24an atseden eguna dute, eta beraiekin hitzordua edukiko du; beraien hoteletara joango da etenaldian zer egiten duten jakiteko. Hala, Iban Mayo, Haimar Zubeldia, Patxi Vila, Egoi Martinez, Mikel Astarloza eta beste zenbait txirrindulariren iritziak jasoko dituzte. Bakoitzak bere taldea nola dabilen azalduko du, zer nolako sentsazioak dituzten, espero zutena bete duten ala ez, etab.

Bukatzeko, atzera zale artera, Tourreko hamaseigarren etapan bilduko diren jarraitzaile euskaldunen iritziak ezagutuko dituzte. Jardunaldi hau Orthezen hasi, Izabatik igaro eta Aubrisqueko portuan bukatuko da. Beraz, "Zaleon Tourra 2007" erreportaje berezian zaleen eta profesionalen hitzak eta bizipenak jasoko dituzte.

Aurreko urteetan bezala, Pirinioetako maldak jendez gainezka egongo dira eta kamiseta laranja eta ikurrinak nonahi ikusi ahal izango ditugu. Julian Iantzik, Tourrera doan lehen aldian, zaletuekin biziko du Tourraren Pirinioetako igarotzea.