Ostegun honetan, Roberto Moso kazetariaren La Radio Encendida liburua aurkeztu da. Bertan, bederatzi kontakizun eta bere irratiko jarduna biltzen duen diskoa daude. Roberto Mosoren hirugarren liburua da, oraingo honetan Radio Euskadik argitaratua.
Lan hau osatzen duten bederatzi kontakizunetan garai bateko kontuak harrotzen ditu idazleak: moda-modan zeuden diskoteketako giroa, ia-ia ligatzeko aukera eskaintzen zuten jai zalapartatsuak eta Marxen doktrinaren bi orrialdetan oinarritutako militantzia porrokatua, esate baterako.

Pedro Ugarte idazleak honako hau esan du liburuaz: “Roberto Mosoren literaturak, dibertitua, irekia eta bizi-bizia izateaz gainera, eragin bihurria du, beti ere benetako idazleak izan behar dituen oinarri eta gidak galdu gabe”. Pedro Ugarte eta Gari abeslariarekin batera, Roberto Mosoren lagun eta lankide ugari egon da Euskal Irrati Telebistako egoitza berrian egin den liburuaren aurkezpenean.

La Radio Encendida-k biltzen dituen kontakizunak "garai hori bizi izan zuen edozeinen istorioak dira. Oraindik ere ahaztu eta irentsi ez dituzun jai handi haiei buruz ari dira; zure bizitza aldatu zuen astearte arratsalde hura ekarriko dizute gogora, maitemindu zinekoa edo 80. hamarkada zurrunbilotsuak. Zaletasuna sortzen duen liburua da”, adierazi du egileak.

Roberto Moso kazetaria da. Irratian eskarmentu zabala du, 20 urterekin hasi zen lanean eta Radio Euskadin aritu da batez ere. Hainbat esparrutan trebatua: albistegiak, gaueko saioak, unitate mugikorra… Horrez gain irratsaioak ere gidatu ditu: “Radiotxok”, “La Noche de la Iguana” eta “Ahiko a 45”, esate baterako. Abeslari eta rock konpositore ere bada (Zarama 1977-1995). Prentsan idatzi du eta telebistan gidoilari, aurkezle eta programa zuzendari izan da (“Cita en el Infierno”, “El Periscopio”). Euskal Telebistako entretenimendu arloko arduradun izan zen. La Radio Encendida bere hirugarren liburua da. Aurrekoak Cuentos y Susedidos Bastos eta Flores en la Basura dira.