Asteleheneko eta astearteko atalekin bukatuko da Euskal Telebistako "Goenkale" telesailaren aurtengo denboraldia.

Asierri premiazko ebakuntza egin beharko diote, eta Nekaneren bizia ere arriskuan egongo da. Andonik oso erabaki zaila hartu beharko du hilzorian duen neskalagunaren bizia salbatu nahi badu. Bien bitartean, Agurtzane azkenekoz elkartuko da Martxelorekin eta hitzordu honek etorkizunean eragin latza izango du.

"Goenkale" zaleak zorioneko dira, izan ere, 1994eko irailean lehenbiziko aldiz emititu zen telesail mitiko hau irailean itzuliko da berriro ere ETB-1era. Urte hauetan guztietan ikus-entzule euskaldunen arreta berenganatzea lortu du. Eta laster, gainera, "Goenkale" saioak 2.500garren atala ospatuko du modu berezi batean. Arraldeko bizilagunak irailean itzuliko dira, jarraitzaileei zirrara eragingo dien pertsonai eta istorio berriekin. Mirari eta Kevinen maitasun harremanak susperraldia biziko du, eta Agurtzane eta Peio ere elkarrengana gerturatuko dira. Harreman honek Kevinen eta bere aitaren arteko erlazioa zaildu egingo du. Gainera, Peio ez da bakarrik itzuliko herrira. Bere emaztea eta bera banandu egin dira, eta seme batekin jarriko da bizitzen Arralden.

Bestalde, maitasun kontuetan hain ondo ez dabiltzan hainbat bikote sendo apurtu egingo dira. Era berean, bereizi zen bikoteetako batek, Leonorrek eta Koldok osatutakoa, atzera hartuko du harremana berriro. Baina orain arte "Goenkale"n inoiz egon den bikote egonkorrenaren adiskidetzea hirugarren lagun batek etengo du.

Juliaren eta bere sendiaren bizitzan ere pertsonai berria sartuko da bat-batean. Marialuisaren gonbidatu hau egun batetik bestera agertuko da eta denen harridurarako bertan geratzeko asmoa azalduko du. Bestalde, Martxelo leku ezezagunen batean dago, baina bere gorpua topatzen dutenean zalantza guztiak argituko dira. Une horretatik aurrera, Julia eta Agurtzane izango dira hilketa burutu izanaren susmagarri nagusiak.