Australiako Lonely Planet argitaletxeak Estatu espainiarra hautatu du bidaiei buruzko lehen hilabetekaria argitaratzeko. Abuztuaren 28an, Lonely Planet magazine aldizkariak 60.000 aleko tirada izango du gaztelaniaz. Aldizkari berri honek Lonely Planet eta bidaietako kazetaritzan adituak diren beste argitaletxe ezagunetako idazleen kolaborazioa izango du. 5,95 euro balioko du eta 164 orrialde izango ditu lehenengo aleak.

 

Hiru zatitan banatuko dute aldizkaria. "Miradas del mundo" izango da lehenengoa, bertan proposamenak egingo dira gertuko eta urruneko lekuetara bidaiatzeko. Erdikoa izango da zatirik luzeena, gai bakar bat jorratuko da herrialde, hiri edo eskualde bati buruz eta hori osatzeko asmoz, sakonean aztertutako artikuluak eta argazki esklusiboak izango ditu. "Bloc Lonely Planet" da aldizkariko azken orriak beteko dituen zatia, mundua ezagutu nahi dutenentzako aholkuak eman eta informazio trukeak egingo dira. Gainera, aldizkariaren lehenengo alean Toni Wheleer Lonely Planet enpresako sortzaileak artikulua idatziko du.

Grup Cultura 03ko Sapiens Publicaciones argitaletxea arduratuko da argitalpen berri hau Estatu espainiarrean publikatzeaz. Planeta Taldeko Geoplanetaren laguntza ere izango du, izan ere, enpresa hori da Lonely Planet Espainian eta Hegoamerikan argitaratzen duena. Enpresa bezala, duela 30 urte sortu zen Lonely Planet eta egun sei milioi gida saltzen ditu urtean. Egoitzak ditu Australia, AEB, Londres eta Bartzelonan.