“Euskal Herria, Bide Batez / Rutas por Euskal Herria” estreinatuko du laster Euskal Telebistak lehen katean. OndorenETB-2n ere emango da dokumental saioa. “Euskal Herria: Lau Haizeetara” egin zutenen eskutik dator proiektua eta Gromaz ekoitzetxeak egin du. Euskal geografia beste begirada batetik erakutsi nahi du. Xarma berezia duten 13 ibilbide aukeratu dituzte txango honetarako.

13 atal ditu dokumental sailak, 25 minutukoa bakoitza. Herri eta parajeetatik barrena bidaia ikusgarria proposatuko dute. Erakin, gaztelu eta katedraletan barna eta historiaz kutsatutako eraikinetan dauden hotel eta jatetxeetan ere erreparatuko dute, besteak beste.

Ez da bakarrik leku bakoitzaren alderdi historikoa jorratuko, “alderdi dibertitua ere kontuan izan nahi dugu, arrasto eta jakingarri interesgarriak ere eskaini nahi ditugu hainbat gauza egiteko”, adierazi du Eduardo Llorente saioaren zuzendariak. Inguruan dagoen jardun turistikoari, eta jai eta ohiturei begiratuko diete, ikus-entzuleak leku horretara erakartzeko.

“Gure helburua ikus-entzulea entretenitzea da eta jendea ibilbide hauek egitea animatzera, ibilbide errealak eta errazak dira”, diosku Llorentek. Ibilbide batzuk beste batzuk baino errazagoak dira, baina oro har, oinez, bizikletaz, kotxean edo itsasontziz egin daitezkeen txangoak dira.

“Euskal Herria, Bide Batez” saioak ibilbide eta leku interesgarrienak diseinu modernoko mapa bidez erakusten ditu; saio osoa bezala, berritzaile eta freskoak dira mapa hauek ere. Grabazioak goi teknologia erabiliz egin dira. Steadycam eta Car Kamera bidez, esate baterako. Kalitate handia eskaintzen duten sistema hauek airez hartutako irudiekin tartekatu dituzte.

Lehen atalean, Urdaibaiko eskumako ertzetik ibilaldia proposatuko dute. Alderdi hori ez dago oso jendeztatua eta bere horretan gordetzen ditu paisaia historiko eta kultur identitate arrastoak. Ibilbide berdea da, kulturaz, historiaz eta naturaz hornitua.

Balea bidea atalak Gipuzkoako kostaldeko herriak ikustera gonbidatuko gaitu. Ermita eta eliza gotikoak nabarmentzen dira ibilbide honetan. Arrantzale eta itsasoan galdutakoak babesten zituzten santuei eskainiak daude eliza hauek.

Ardo eta gazteluen ibilbidea izeneko saioak Arabako hegoaldera garamatza, Nafarroa eta Gaztelako erreinuak XII. mendean banatzen zituen muga zaharraren urratsa jarraitzera. Bertan, harresitutako hiri eta dorre feudalekin egingo dugu topo.