XXI. mendeko gaitz zabalenetakoa da depresioa eta horren inguruko erreportaje berezia eskainiko du Euskal Telebistako lehen kateak asteazken gauean. Zuloan lanean Euskal Herriko hiru gaixorekin hitz egingo dute: Iñaki, Mirari eta Ane. Sexu, adin, lanbide eta bizileku ezberdinak dituzte, eta, hala ere, sufrimendua eta samina bera da.

Datuek diotenaren arabera, gaur egun 120 milioi pertsona dago munduan depresioak jota. 2006an Euskadin 10.000 laguni diagnostikatu zioten depresioa eta antsietatea. Gaitza hain zabaldurik egon arren, depresioa duten gaixoen %10a bakarrik joaten da espezialistarengana. Garatutako herrialdeetako langileen artean, Lanaren Nazioarteko Erakundeak dio 10etik batek depresioa, antsietatea edo estresa jasaten duela.

Azken hamarkadan hirukoiztu egin da antidepresiboen salmenta eta lasaigarriena bikoiztu. Gure eguneroko bizitzan depresioa tristurarekin nahasten dugu sarritan. Baina ez dira gauza bera. Depresioak kalte egiten dio osasunari, norberaren estimuari, errealitatea ulertzeko ahalmenari, itxurari eta loari. Noiz, zergatik azaltzen dira gure bizitzan? Ze arrisku izan dezake gaixoak? Nola lagundu hurbileko gaixoari? Galdera hauei erantzuna ematen saiatuko dira erreportajean.

Depresioa bizitzaren edozein ataletan ager daiteke, baina arruntena 20 eta 50 urte bitartekoen artean sortzea da. Normalean, emakumeek depresioaren atzaparretan jausteko arrisku handiagoa dute; gizonari, berriz, zailago egiten zaio aitortzea depresioa ari dela sufritzen.

Aditu batzuentzat modako gaixotasuna da, beste batzuentzat gizarte berriak indartutakoa. Blas Erkizia psikiatra da, eta Osakidetzako Beasaingo eta Azpeitiko Osasun Mentaleko Zentroak zuzentzen ditu. Horrez gainera, hainbat argitalpen ere baditu psikologiaz eta psikiatriaz. Erkiziak gaixotasun hau hobeto ulertzeko gakoak eskainiko ditu.