Asteazken gauetan Euskal Telebistako lehen kateak gaurkotasunarekin lotutako gaiak jorratzen dituzten dokumentalak eskaintzen ditu. Aste honetan, prostituzioaz arituko dira Argi Gorripean izeneko erreportajean, iluntzeko 22:00ak aldera.

Argi Gorripean erreportajeak Euskal Herriko putetxeek nolakoak diren, zer ezkutatzen duten eta ze jende mota gerturatzen den aztertuko du. Hiru dira etxe hauetako protagonista nagusiak: jabeak, bezeroak eta emakumeak. Negozio honen mugei buruz -bai legalak, bai moralak– zer deritzoten jakingo dute ikus-entzuleek, euren ahotik entzunda.

Berez ilegala da Espainian zein Frantzian. Baina Espainian ez bezala, Frantzian klubak ere negozio ilegaltzat hartzen dira. Horregatik oso ohikoa da Euskal Herriko putetxeak mugaz bestaldeko bezeroez betetzea. Begirada bat bota ezkero, klub gehienak Donostiatik Frantziako mugan eta Bilbo eta bere inguruan azaltzen dira.

Espainiar Estatua Europako prostituzioaren paradisutzat jotzen da. EAEn 2.000 emakume inguru biltzen ditu negozioak, Nafarroan, berriz, 700 bat. Negozioak Espainiar Estatuan 18.000 milioi euro mugitzen ditu urtean, Euskal Autonomi Erkidegoan 40 milioi eurotik gora.

Azken urteetan desagertzen hasi da kaleko prostituzioa. Geroz eta gehiago dira pisuetan isilpean eta anonimatuan gordetzen direnak. Baina oraindik ere klubetako argi gorriek kaleak koloreztatzen dituzte. Eta lokal hauetako jabeek ateak ireki dizkiote Euskal Telebistako erreportaje honi.