Bilbao BBK Live Festival musika jaialdiaren bigarren edizioko informazio guztia eskainiko du Euskal Telebistako "EiTB Kultura" saioak aste honetan. Ekainaren 21tik aurrera nazioarteko artistarik onenak bilduko dira Kobetamendin. Ekitaldi handi hau antolatzen duen Last Tour International enpresak aurtengo berrikuntza guztiak eta joko duten taldeen inguruko datuak emango ditu.

Emanaldi jendetsuak gustuko ez dituztenek, Chico y Chica taldearen zuzeneko batekin gozatzeko aukera dute. Lady Eel eta Rey Sakakaran Neroly taldeko kideek hirugarren diskoa atera berri dute merkatura, Bomba Latina izenburuarekin. Euren ibilbide profesionalaren errepaso zabala egingo dute bilbotarrek.

Ibilbide luzea ere Trapu Zaharra antzerki taldearena. Donostiarrak Visa Vis ikuskizunaren biran murgilduta daude. Santi Ugalde aktoreak ("Vaya Semanita"ko Joxepo), bankuak eta kontsumo-gizartea kritikatzen duen antzezlan honen ezaugarriak aztertuko ditu ETBrako.

Ondoren, Ione Saizar argazkilari zarauztarrarekin solastatuko dira. Londonen bizi da baina Donostian harrapatu dute argazki batzuk egiten. Bere ibilbide artistikoaren hainbat datu interesgarri ezagutuko dugu.

Clemente Padin poeta ezaguna izango da aste honetako beste protagonistetako bat. 67 urteko idazle uruguaitarrak artearen bide berriak ikertzen ditu, teknologia berriek eskaintzen dituzten baliabideak, esaterako.

Jarraian, Zaragozan dagoen Veruela monsategira bidaiatuko du "EiTB Kultura" saioak. Bertan, Euskal Herriko hainbat artisten lanak daude ikusgai, Dora Salazar, Fernando Villena eta Ramon Carrerarenak, besteak beste. Erakustaldiak "Referencias" du izenburu. Eta Zaragozatik Donostiara bueltatuko dira Isabel Muñoz argazkilariak Kursaalen dituen argazkiak ikustera.

"EiTB Kultura" asteartero emititzen da 00:50ean ETB-2n eta ostegunero 23:50ean ETB-1etik.