Azterketa garaian daude buru belarri neska-mutilak, eta horregatik Euskal Telebistako "Bi Errepidean" saioa ikasleen bizimoduaz arduratu eta gazteek egun hauek nola bizi dituzten jakin nahi izan du.
Ikasleena omen da bizimoduen artean hoberena. Hala entzun izan dugu maiz; baina hori benetan horrela ote den jakiteko haiekin hitz egitea bezalakorik ez. Horretarako, bi ikasle aukeratu ditu programak, Unai Egaña eta Goretti Etxegarai. Ikasleen egoitza batean bizi da bata eta ikasle pisu batean bestea. Bi bizimodu horien arteko aldeak aztertuko ditu "Bi Errepidean"ek aste honetako atalean.

Unai Egaña Donostiako ikasleen egoitza batean bizi da. Bere logelatxoa du eta sukaldea alboko neskarekin partekatzen du. Psikologia ikasten ari da, hirugarren mailan, eta orain arteko ikasturte guztiak beste erresidentzi batean eman ditu. Gustura bizi da 300 pertsona biltzen diren tokian. Jende artean sortzen den saltsa gogoko du. Egunero ezagutzen du lagun berriren bat, eta egoitza batek harreman gehiago egiteko aukera eskaintzen duela uste du. Erresidentzian pisuan bizitzea baino garestiagoa dela, horixe desabantailetako bat.

Bestalde, Goretti Etxegarai lesakarra bere eskualdeko beste bi neskekin batera bizi da Antiaguako pisu batean. Gurasoen magaletik alde eginda, etxea gobernatzeak zer suposatzen duen ikasi du bertatik bertara: etxeko lanak egin behar, dirua administratzen… Pisukideen arteko harremanak ere ez dira beti errazak izaten, baina egoera berean daudenen artean elkartasuna ere badela ikusi ahal izango dute ikusleek.