Klima aldaketa hitzetik hortzera dabilen gaia da. Komunikabideak behin eta berriz ari dira beroketa globalak munduan zehar izango duen eraginaz hitz egiten: tenperaturen gorakadaz, poloen urtzeko arriskuaz, itsasoaren maila igotzeaz... Euskal Herrian egoera nola bizi dugun aztertuko du Ama Lur berotua dokumentalak asteazken honetan, ETB-1en, gaueko hamarretan.

Zientzialarien arabera Iberiar penintsula izango da, mundu mailan, klima aldaketaren ondorioz kaltetuenetakoa. Baina, zeintzuk izango dira klima-aldaketak Euskal Herrian utziko dituen ondorioak? Zenbait adituk euren iritzia azalduko dute dokumental honetan, bizi dugun egoeraz eta etorkizunean gerta litekeenaz.

Xabier Caño klima aldaketari aurre egiteko Euskal Bulegoko zuzendariak datu orokorrak emango ditu gainera datorkigunaz jabetzeko, EAEn espero behar dugun egoeraz, epeez...

Xabier Irigoien Ozeanografian Doktore eta AZTIko Ozeanografia Biologikoa ataleko koordinatzailea da. Itsasoan eta gure kostaldean izango diren eraginak azalduko ditu: hondartzak, kostaldeko herriak, arrantza...

Iñaki Antigüedad EHUko Hidrogeologian Katedradunarekin urari eta ibaiei buruz hitz egingo dute. Euri gehiago edo gutxiago egingo duen, noiz eta nola botako duen, zer geratuko den ur emariekin, uholde arriskuaz...

Arturo Elosegi Biologian Doktore, Ekologo eta EHUko irakaslea da. Gure ingurumenean izango diren aldaketak aztertuko ditu: basoak, biodibertsitate murrizketa, nekazaritza...

Ama Lur berotua dokumentalaren grabazioa road movie bezala egin da. Hau da, Euskal Herri osotik bidaia egin dute, klima, paisaia eta ekosistema ezberdinetan izan daitezkeen ondorioak ezagutzeko. Gonbidatuak gaiari lotutako toki esanguratsuetan elkarrizketatu dituzte.