Internet RCTV Venezuelako kanalaren aliatu bihurtu da, atariak eta YouTuberen moduko bideo orriak erabiltzen hasi baita hainbat saio igortzeko, nahiz eta bost egun igaro diren dagoeneko, Gobernuak emititzeko baimena berritu ez zionetik, telebista horri urte asko “kolpista” deitzen eman ondoren.

Igandeko gauerdian transmisioa moztu behar izan zuenetik, Venezuelako telebistarik handiena eta hedatuena bide alternatiboen bila ibili da herrialdeko etxeetan egoten jarraitzeko. Gainera, ez dute noizbait normaltasunez funtzionatzeko itxaropena galtzen.

“2 kanalaren seinalea itzuliko digutela espero dut. Dena den, horrela ez bada, egiten dakiguna egiten jarraitzeko era lortuko dugu”, esan zuen Guillermo Piñate telebista kate horren albistegietako langileak.

Hala ere, Hugo Chavez Venezuelako presidenteak osteguneko gauean ziurtatu zuenez, hartutako erabakia ez du atzera botako, nahiz eta “oligarkak” haserretu.

Kanal horretan lan egiten dutenentzat, hitz txarrak bihurtu dira Hugo Chavez, eta haren aurkako hitzak esateari ez diote uzten. Bitartean, egunero El Observador albistegiaren hiru edizio igotzen saiatzen dira.