Euskal Telebistak drogen mundura egingo du jauzia asteazken iluntzean Gaueko arrastoa dokumentalaren eskutik. 22:00etatik aurrera gaur egun ze droga mota kontsumitzen den eta zergatik hartzen diren azalduko du lan honek.

Drogak betidanik egon izan dira gizarte guztietan, eta maila sozial ezberdinetako pertsonek hartu izan dituzte. Hala ere, gaur egun kontsumoak gora egin du eta drogen munduan hasteko adina nabarmen jaitsi da. Garai batean, esklusio sozialerako gaia, egun sozializatzeko modu bilakatu da. Gazteen artean ongi ikusia dago, eta gainera prezioak merkeak dira eta legez kanpoko sustantziak errez lortu daitezke.

Erreportaje honetan egun zer eta zergatik kontsumitzen den argituko dute. Bestalde, drogen kontsumoak ze ondorio dakarren ere aztertuko dute. Horretarako, drogen munduarekin erlazio zuzena duten pertsonengana gerturatu dira.

ETB-1eko kamerak kalera irtengo dira gure herri eta hirietan gaua nola bizi den ezagutzeko. Gazteek non, nola eta zer kontsumitzen duten ikusteko aukera izango dute ikus-entzuleek. Era berean, drogekin arazo larriak izan dituzten bi gazte, 30 urteko Asier eta 24 urteko Jokin, elkarrizketatu dituzte. Bata sei urtez izan da anfetamina eta pastilla kontsumitzailea eta kokaina ere urte betez hartu zuen. Bestea, berriz, sei urtez polikontsumitzailea izandakoa da.

Bestalde, Arkaitz Agerretxe neurosikofarmakologo eta menpekotasun arazoetan adituak kontsumoaren eragin eta kalteez hitz egingo du. Eta bukatzeko "Ai laket!!" droga erabiltzaileen elkarteko kideen bitartez substantziak gertuagotik ezagutuko dituzte ikus-entzuleek.