Aste honetan, belaunaldi ezberdinetako musikariak elkarrizketatuko dituzte "EiTB Kultura" saioan. Alde batetik, Berako Sexty Sexers banda gaztearekin izango dira. Urkamendi Blues izenburupean plazaratu dute euren bigarren lana, 70ko hamarkadako rock and rollaren kutsu nabarmenekin. Bestalde, Imuntzo eta Beloki trikiti bikoteak ere disko berria du merkatuan, Gauaren heldua. Euren seigarren lana da eta bertan tradizioa eta modernitatea batu dituzte. 13 abesti ditu albumak eta "Lehia ez da nahia" pieza dantzagarriarekin aurkeztu dute.

Ramon Barea aktorearekin ere solastatuko dira luze eta zabal. Bilboko aktore ezaguna El chico de la última fila antzezlana aurkezten dabil herriz herri. Egunotan Gasteizen dago. Helena Pimenta antzezlanaren zuzendariak eta Ramon Bareak berak Ur Teatro Antzerkia konpainiaren lan berriaren nondik norakoak kontatuko dizkigute.

Ekainaren 2an Arabako Delika herriak Alboka Eguna ospatuko du. "EiTB Kultura", soinu-tresna honen ezaugarriak ezagutzeko nahian, albokak artisauki egiten dituen luthier batekin izango da. Euskal Herriko klarinete bikoitz honen sekretu guztiak kontatuko dizkigu.

Jarraian, Sane Society komunitate artistikoa zer den azalduko digute. Mundu guztiko eta alor eta joera imajinagarri guztietako pertsona sortzaileek beraien ideiak interneten azaltzen eta eztabaidatzen dituzte. Gasteizen du egoitza fisikoa.

Ostean, Epelde eta Mardaras galeristek Bilboko Erriberako Merkatuan ikusgai duten bigarren erakustaldia bisitatuko dute. "Outsiders" izenburua du eta 12 artista hasi berrien lanak daude erakusgai.
Iruñera ere joango dira Nafarroako artisten lanak ezagutzera. 22 margolari nafarrek euren lanak dituzte ikusgai Baluarten, "Silencios" izenburupean.

"EiTB Kultura" asteartero emititzen da ETB-2n 00:45ean eta ostegunetan ETB-1en 00:10ak aldera.