"Mihiluze" lehiaketak urtemuga eguna du asteartea, maiatzaren 15a, emitituko den programa 100.a izango baita. "Mihiluze"ren 2. edizio hau urrian hasi zenetik, dagoeneko 208 lehiakidek hartu dute parte programan. Gainera, astelehenean, 7.485 €ko zakua banatu zuen eta guztira, programa hauetan guztietan, 100.000 € banatu dira. Ehun programa hauetan Euskal Herri osoko, eta adin eta tankera guztietako lehiakideak ikusi ditugu. “Mihiluze”n aniztasuna ederki islatu dute jolasean aritu diren lehiakideek.

Eguneroko programaz gain, bestalde, hilabete hauetan “Mihiluze” bereziak ere eskaini dira, bai umeekin eta baita famatuekin grabatutakoak ere. Ikusleek oso harrera ona egin diete programa hauei. Inondik ere, ikusleek maite dute haurrak helduen lekuan ikustea eta zelako trebeziaz eta abileziaz erantzuten eta asmatzen duten jarraitzea. Baita famatuekin gozatzea, "Mihiluze"ren proba desberdinetan nola moldatzen diren ikusiz.

Hau guztia gutxi balitz, asteleheneko programan "Mihiluze"k 7.485 €ko zakua banatu zuen. Diru kopuru hori irabazi duen bikotea Maitane Mazmela arrasatearrak eta Endika Martin zestoarrak osatzen dute. Bere lehen programa zen atzokoa eta puntuaketarik onena lortu eta gero, Zer da zerera iritsi eta diru kopuru potolo hori irabazi zuen. Eta, "Mihiluze"ren arauei jarraiki, astearteko 100. programan jolasten jarraituko dute.

Bikote honetaz gain, beste zortzi bikotek ere eraman dute “zakua” bete diru "Mihiluze"n. Momentuz zakurik potoloena 19.880 eurokoa izan da eta Ane Odriozola legazpiarrak eta Iñaki Urionabarrenetxea arrasatearrak irabazi zuten. Hazparneko Katti Pocheluk eta Donapaleuko Arño Aizagerrek, berriz, 17.962 euroko zakua lortu zuten.

Hauez gain bada noski zakua lortu ez baina diru kopuru garrantzitsua eraman duten beste hainbat bikote. Jada 100.000 euro baino gehiago banatu dira “Mihiluze”n.

Orain arte "Mihiluze"k oso harrera ona izan du ikus-entzule aldetik eta urte hasieran zabaldu zen "Mihiluze"ren www.eitb.com/mihiluze web-orria, bestalde, bisitatuenetarikoena da: 1.170.000 orri zerbitzatu ditu 2007ko lehen lauhilekoan.