"Zuzen" saioak webcam bidez parte hartzeko aukera eskainiko die ume guztiei hemendik aurrera. Telebistan, Joseba Olagaraik eta Okerrek gidatzen duten lehiaketan parte hartzen duenaren ahotsa entzuteaz gain, bere aurpegia ere ikusi ahal izango dute ikus-entzuleek. Estatu mailan teknologia hau erabiltzen duen lehen telebista katea izango da ETB.

“Zuzen” lehiaketan parte hartzeko modu berria prestatu du Euskal Telebistak, lehen aldiz, etxean dagoenaren irudia zuzenean erakutsiko duena. Horretarako, nola ez, ordenagailuari itsatsiriko webcam bat behar da, baita mikrokaskoak eta banda zabaleko konexioa. http://www.eitb.com/betizu/ web orriaren bitartez burutuko da hartu-emana. Egin beharreko guztiak ere bertan ageri dira.

Euskal Telebista aitzindaria izango da halako teknologia erabiltzen Estatu mailan. Etorkizuneko telebista digitalari begira pauso berri bat eman nahi izan du, ikus-entzuleari zuzenean parte hartzeko tresna berri bat eskainiz.