"Kalaka"ko Inma Zabaleta kazetariak Unai Basurko itsasgizonari eskainitako elkarrizketa eskainiko dute ETB-1en, ostegunean, gaueko hamarretan. Velux 5 Oceans proban egindako balentriaz aritu da marinela eta euskal kostaldeko turismo ereduaz duen iritzia ere emango du. Hain zuzen ere, turismo ereduaren inguruan luze mintzatuko dira programako kolaboratzaileak, Xabier Euzkitze aurkezleak gidatuta.

Euskal Herrian, eta bereziki kostaldeko herri eta hirietan, 2002tik hona turismoak gora egin du nabarmen. Gaur egun, gure kostaldeko herri askorentzat jardun ekonomiko funtsezkoa bihurtu da sektore hori eta oraindik hazten jarraitzeko aukera handia du. Hazkunde hori zein ereduren arabera egin behar den eztabaidatuko dute aste honetako emisioan, eta bereziki, kirol portu eta urbanizazio proiektuei erreparatuko diete.

Koro Garmendia Eusko Jaurlaritzako Turismo sailburuordea, Iñaki Zarraoa Getxoko alkatea eta Iñaki Barcena Ekologistak Martxaneko ordezkaria gonbidatu dituzte propio eztabaida horretarako. Lagun izango dituzte mahaian ohiko kalakariak ere: Iñaki Antigüedad hidrogeologoa, Koldo Goitia kultur eragilea, Arantxa Azurza Zuzenbidean lizentziaduna, Arantxa Urretabizkaia idazlea eta Roberto Fernandez Sasia irakaslea.

Hauteskunde kanpainako atarikoa

Turismoaz gain, maiatzaren 27ko hauteskunde atarikoez ere arituko dira. Kanpaina hasi aurreko azken orduetan, giro politikoaz, balizko paktuetaz eta zerrendei buruz ere egingo dute solasa mahaiaren bueltan eseriko diren kalakariek.