Zeppelin Televisionek lan-harreman zuen hainbat enpresei eta loturarik ez zuten bi pertsonei -psikologo kabinete bateko laguntzaileak- 7.000 laguni buruzko datuak eman zizkien, babesik gabe, tartean programako erredaktoreek eskuz idatzitako ohar iraingarriak zeudela.

Artxibo hori Interneten zintzilikatu zuten, Datuak Babesteko Agentziak topatu egin zuen eta isuna jarri zion produktorari.

Auzitegi Gorenak berretsi egin du Datuak Babesteko Agentziak Gran Hermanoko produkturari jarritako 1,08 miloi eurotako isuna. Aurrez Auzitegi Nazionaleko Administrazioarekiko Auzietako Salak ere berretsi egin zuen baina Zeppelinek helegitea jarri zuen.

Epaiak dioenez, produktorak 7.000 lagunen gustu, ideologia, sineskera erlijioso, arraza, osasun eta bizitza sexualari buruzko informazioa jaso zuen pertsona horiek datu horiek informatikoki tratatzeko baimenik eman ez zuten arren, eta gainera, behar den babesik gabe, datu horiek kontratu harremanik ez zuten pertsonei eman zizkien.

Auzitegiak bertan behera utzi ditu Zeppelin Television S.A.k aurkeztutako alegazio guztiak.

"Inkongruentea da adierazi gabeko baimena zutela esatea pertsona horiei artxiboa esistitzen dela ere esan ez zaienean" dio epaiak.