Europako Kubarekiko Elkartasun Mugimenduak informazio alternatiboa emango duen informazio-proiektua jarri du martxan, gaur, maiatzak 1, "Kubako Iraultzak nozitzen duen etengabeko manipulazioari aurre egiteko".

 

EUSKADI-KUBA taldeko Komunikazio Atalak sortu du Cubainformacion eta lau euskarritan oinarritzen da: Internet bidezko telebista edo web TB, asteroko irrati programa, albiste web bat eta hiruhilabeteroko paperezko argitalpena. http://www.cubainformacion.tv/ web orriaren bidez sar zaitezke horietara.

Cubainformacionen helburua "Kubak informazioaren oligopolio handiengandik (AEBetako eta Europakoak, batez ere) jasaten duen blokeo mediatikoari aurre egitea da". Bultzatzaileek uste dute "Kubako iraultzak etengabeko manipulazio informatibo kanpaina" jasaten duela, "Kubako garapen eredua eta bere sistema politiko eta ekonomikoa gauzatuezina, injustua eta demokraziaren kontrako balitz bezala erakutsiz".

Horregatik, Kubarekiko Elkartasun Mugimenduak bere lan ildo garrantzitsuenetako bat bezala onartu du "blokeo mediatiko horren kontra borroka egitea: Kubaren egiazko izatea ezagutzera ematea; justizia eta herri partaidetza esperientziak, nazioarteko erakundeek babestutako lorpen sozialak, beste herriekin dituzten lankidetza eta elkartasun programak etab. seriotasun informatiboz zabalduz".

Eusko Jaurlaritzaren Garapenaren Lankidetzarako Zuzendaritzak lagundu du diruz du Cubainformacionen diseinua eta abian jartzea.