Nafarroan euskaraz diharduten sei irratik Nafarroako Irrati Euskaldunen Sarea (NIES) sortu dute, ezinbestekotzat jotzen baitute "hizkuntza-gabeziei" erantzuteko, "herrialde osoa hartzen duen proiektua garatzea".

NIESek bere webgunean aipatzen duenez, elkartutako irrati bakoitzak bere lan-esparrua eta zabalpen eremua dauka baina guztiek dute helburu bera: "euskara biziberritzea". Hori dela eta, bat eginez "Nafarroako tokian tokiko hizkuntza-komunitatea sendotzen" ari direla uste dute.

Hemendik aurrera "baliabideak eta ekoizpena optimizatuz, Nafarroa osora hedatuko den programazio bateratua emititzeko nahia" dutela adierazi dute.

Beren programak digitalean aireratzeko eta elkartrukerako oinarriak jarri dituzte dagoeneko Euskalerria Irratia, Xorrixin, Esan Erran, Beleixe, Aralar eta Karrape irratiek.

Interneten ere zabaldu dute sarea. Irrati bakoitzan bere web gunea du eta guztiek bat egiten dute www.nafarroakoirratiak.com helbidean.