Ane protagonistak madarikatutako herri horretan ezkutatzen den sekretua agerian utziko du azkenean. ETB-1eko telesaila jarraitu dutenek ezin dute igandean, gaueko hamarretatik aurrera, ikusgai izango den azken atala galdu. Inor ez ezer ez da dirudiena, eta behingoz parke natural honek gordetzen dituen kondaira eta gertakari ilunen zergatiak ezagutuko ditugu.

Gorka Enararen mutila dela jakitean Ane zur eta lur geldituko da; baina orain inoiz baino gogotsuago saiatuko da misterioa argitzen. Ertzaintzak Iratiren bilaketa lanak bertan behera utzi dituela zabalduko da herrian. Baina Aneren ustez kobetan topatuko dute gaztea eta mutilak konbentzituko ditu hara joateko.

Bitartean Bixentak Mentxuren gaineko egi guztia kontatuko dio Jesusi. Maddi txikia eta bera lekuko zirela emakumeak bere buruaz beste egin zuen.

Bestalde, Antoniok Rosarekin berba egingo du lursailen kontua dela eta. Gogoeta egin ostean, basozainak jatorrizko jabeei euren lurrak berriro saltzea erabaki du. Baina bere asmoarekin aurrera egin baino lehen ezusteko desatsegina izango du.

Koba barruan dela, Ane galdu egingo da eta Irati bahituta daukaten txokoraino helduko da. Baina neska askatu aurretik hiltzailearen atzaparretan eroriko da.

Zirraraz eta azpijokoz betetako hamabost atal hauetan Ane protagonistak Enara ahizparekin zer gertatu zen jakiteko arrastoen bila ibili da. Balbemendin beso-zabalik hartu dute hainbat lagunek, baina hasieratik kontran izan dituen auzokideen aurka aritu behar izan da baita ere.