Ondo pasatzeko gonbida dakar astero legez “Wazemank” saioak Gorka Knörr politikari eta abeslariaren parodiarekin, Atsuek hilerrira egingo duten bisitarekin, Barlonbrando gailegoaren tabernako gorabeherekin eta Mañukortaren ateraldi xelebreekin.

Anjel Alkain, Mikel Laskurain, Ana Elordi, Ainere Tolosa, Jon Iraola, Egoitz Lasa, Mikel Pagadizabal Pagadi, Iñake Irastorza, Ixabel Agirresarobe, Aitor Gabilondo, Nagore Aranburu eta Anartz Zuazua aktoreekin, umorezko esketx eta imitazio barregarriez gozatzeko parada izango dute ikus-entzuleek larunbatean, gaueko hamarretatik aurrera, “Wazemank” saioan.

Aitonak, Nekanek, Ferminek, Idurrek eta Jokinek osatzen duten Tivi familya bezalaxe, etxeko sofan eserita, Arregitarren baserriko azken gertaerak ezagutuko ditugu. Etxeko nagusia, Joxe, petrikilo ona dela zabalduko da eta bikote gazte bat aholku bila etorriko zaio baserrira.

Igande eguerdirako errezeta aproposa Earki Gatxik ataleko Xabier Euzkitzek (Anjel Alkain) eta Joxean Tolosak (Jon Iraola) ekarriko digute eta euskararen inguruko zalantzak argituko dituzte Euskaltzaindiaren Larrialdiak zerbitzukoek. Oraingo honetan aldagela batzuetan dauden lagunek deituta etorriko dira.