Larunbat honetan izango da bueltan ETB-1eko programazioan Mikel Elizegik aurkeztutako “Ordu Txikitan” saioa, gaueko 22:00etan. Denboraldi honetako lehen saioko gonbidatua Abraham Olano izango da. Txirrindulari ohiak zazpi kazetari gazteen galdera zorrotzei aurre egin beharko die, pertsonaia ezagunaren atzean ezkutzen den izaera bistaratuz. 

Bestalde, egunero sortzen diren albisteen inguruan haurrek duten iritzia eta ikuspuntua ezagutuko ditugu Haur Egun atalean. Bertan haurrek gaurkotasuneko gaiak jorratu eta honen inguruko iritzia emango dute aurkezleak lagunduta.

Publizitateak ere bere tartea izango du. Astero, publizitate spot adierazgarri edota interneten aurkitutako bitxikeriaren bat erakutsiko dute eta kazetari gazteek haren inguruko iritzia eman ahal izango dute. Honez gain, Gu geu gara atal berriari ekingo die. Saio bakoitzean euskaldunon izaera eta nortasuna gehiago ezagutzen lagunduko duen galdera zorrotz bat luzatuko dute, eta haurrekin horren inguruan hitzegin ostean, Mikel Elizegik lortutako emaitza emango du ezagutzera.

Lehiaketak ere bere tartea izango du, baina aurten zenbait berrikuntzekin dator. Batetik, guraso eta seme-alabek, elkarlanean, beraien ezagutzak noraino heltzen diren erakutsi beharko dute. Eta bestetik, nola ez, seme-alabek gurasoek ahotan dituzten abestiak ezagutu beharko dituzte.