Coca Colak espermatozoideak hiltzen dituela edota jendeak, kraska egin ezkero, patata frijitu kerratuak pozik jaten dituela aurkitu duten ikertzaileek IG Nobel sari alternatibo bana irabazi zuten atzo.

Nahaspilatu daitekeen edozer nahaspilatuko dela eta txakurren arkakusoek katuenenak baino altuago salto egiten dutela ikertu zutenek ere saria eraman dute etxera.

Ig Nobel sariak benetako ikerketa saritzen dute, baina Nobel sarien alternatiba izatea nahi dute. Medikuntza, Kimika, Fisika, Ekonomia, Literatura eta Bakea arloetan Nobel sariak datorren astean jakinaraziko dituzte.

Saridunak

Boston University Medical Centerreko Deborah Andersonek eta bere lankideek Kimika alorrean jaso dute saria, 1985an Coca Colaren inguruan egindako ikerketagatik. Andersonen taldeak edari honek espermatozoideak hiltzen dituela aurkitu zuen.

Bestalde, “elikadura sari” bat Trentoko Unibertsitateko (Italia) Maximiliano Zampiniri eta Oxfordeko Unibertsitateko Charles Spencerri eman diote. Patata frijitu freskoak jaten ari zirela sinestarazi zioten lagun talde bati, murtxikatzen zituztenean kraska egiten zutelako. Egia esan, patata kerratuak ziren.

Biología atalean, Frantziako ikertzaile talde batek lortu zuen saria. Txakurren arkakusoak katuenen arkakusoak baino jauzi altuagoak egiten dituztela aurkitu zuten.

Sao Pauloko (Brasil) Unibertsitateko talde batek arkeologia sari berezi bat eskuratu zuen, armadilo batek indusketa arkeologiko bat hondatu dezakeela frogatzeagatik.