Batzuetan ospea nahi gabe heltzen da Interneten, Shenzheneko (Txinako hegoaldea) lantegi batean aritzen den neska bati gertatu zaion moduan. Astebeteko epean Interneteko uda honetako fenomeno bihurtu da: 'iPhone neska' da.

Gaztearen izena ez dute aditzera eman, paparazziak haren bila dabiltzalako. Neskak ez zuen inoiz imajinatu argazki soil batengatik bizitza aldatuko zitzaionik. Appleren iPhone eta iPod muntaketa lantegi batean aritzen da neska, eta lankideak izan ziren argazkia hartu ziotenak.

Izan ere, muntatzen ari ziren iPhonearen argazki-kamera probatzeko atera zioten argazkia neskari, Appleren telefonoetako baten alboan, laneko jantzia jarrita eta garaipenaren keinua egiten.

Baina argazkia ezabatzea ahaztu zuten langileek, eta iPhone hori erosi zuen Kingston upon Hulleko (Ingalaterrako iparraldea) britainiar bati telefonoa hartu eta berehala agertu zitzaion. Halaber, neskaren beste argazki bi ere jaso zituen erosleak.

Sakelako berrian neskaren aurpegia agertzeak harrituta, gaztearen argazkia MacRumors.com webgunean jarri zuen erosleak abuztuaren 20an, 'Markm49uk' ezizenarekin beste norbaitek argazki hori zeukan eta neskaren izena zekien galdetuta.

Astebeteko epean, post horrek bilaketa frenetikoa eragin du, eta neskari 'The iPhone girl' ('iPhone neska') ezizena jarri diote.