Agra (India) hiriko Polizia agiri garrantzitsuak berreskuratzen saiatzen ari da, tximinoen talde batek bertako komisaldegiari egindako erasoren ostean.

Erasoa igandean izan zen eta tximinoei aurre egiteko laguntza eskatu behar izan zuen Poliziak. Orain egoitzan sareak eta burdin hesiak jarri dituzte balio judizial handia duten dokumentuak babesteko, IANS Indiako albiste-agentziak jakitera eman duenez.

Buruko min ugari sortu dituzte tximinoek Agran, Taj Mahal ospetsua dagoen hirian. Horregatik tximinoak oihanera bueltatzearen aldeko kanpaina bat hasi zuten bizilagunek.

Baina ekimena bertan behera geratu zen Maneka Gandhi animalien defendatzaileak gelditu zuelako. Horrela, milaka tximinok nahi dutena egiten jarraitzen dute Agra erdialdeko auzoetan.

"Tximinoek turista askori eraso eta hozka egin diete, baina horiek gelditzeko ez dute ezer egiten agintariek eta gero eta gehiago dira", kexatu da turismo-gidari bat.