AEBetako futbol talde bat ospetsu egin da, baina ez azken partiduan irabaztea lortu zuelako, hegazkinean biluzik zebilela larrialdietako ateak zabaldu nahi izan zituen gizon bat menderatzeagatik baizik.

Massachusettseko New England Revolution taldeko futbolariak azken egunotan inguruko heroi bilakatu dira Bostonetik Los Angelesera zihoan hegaldian egin zutenarengatik.

Bertako prentsak jaso duenez, gizona hegazkineko komunetan biluztu zen eta batetik bestera ibili zen normaltasun osoz gainontzeko bidaiariak zur eta lur utziz.

“Tripulazioak komunera joan eta jantzi zedin eskatu zion, eta hala egin zuen, baina bueltatzean, larrialdietarako ateak irekitzen saiatu zen” azaldu du FBIko bozeramaile batek.

 Orduan, futbol jokalariek gizonaren asmoak ikusita, birritan pentsatu gabe, lekutik altxatu eta gizona menderatu zuten.

Gauzak horrela, gizona Oklahoma Cityra heldu bezain laster atxilotu zuten eta horren ostean hegaldiak berriz bere bidea hartu eta Los Angelesera abiatu zen.