Belgikan ustez 583 gaztelu, etxalde eta luxuzko etxeetan osten ibili zen gizonak, Yves Beaupainek, etxerik "interesgarrienen" gida idatzi du "La Dernière Heure" egunkariak jakinarazi duenez.

Lapurrak dagoeneko 60 epaiketatik 44n erruduntzat jo dute, hala ere, berak beti dio "bisitatxoak" direla. Hain zuzen ere, horrek eman dio izena idatzi berri duen liburuari; hots, "Le guide des 501 adresses à visiter en Belgique" (Belgikan bisitatzea merezi duen 501 helbideen gida), zentzu bikoitza duen izenburua, zalantzarik gabe.

Beaupainek, Arsenio Lupin Belgikako kazetarien izenez, (Maurice Leblanc idazle frantziarraren eleberrietan eskularru zuriz agertzen den lapurra) batez ere, artelanak osten zituen; margoak eta tapizak hain zuzen ere.

Belgikako poliziaren ustez, iaz Beuapainek Alberto erregearen anaiaren etxera "osteratxoa" egitea pentsatu zuen eta 1995. urtean beste hiru lagunekin batera banketxe batean ostu egin zuen.

Lapurreta bat lau pertsonarekin? Nik egin izan banu, bakarrik egingo nukeen, laurekin partekatu egin behar da eta ez da abokatuari ordaintzeko beste ere geratzen.

Arsenio Lupinek esan duenez, "bisita guztiak jende dirudunari egin dizkiot, izan ere, mesprezua baino ez dute merezi jende txiroari lapurtzen diotenek".