Marcos komandanteordea buruzagi zapatistak –bikoterik gabe orain dela bost urte– "erabat maiteminduta" dago Angelina Jolie aktore estatubatuarrarekin, kazetari mexikar bati adierazi dionez.

Laura Castellanos kazetariaren azken liburuan (Corte de caja) EZLN Nazio Askapenerako Armada Zapatistako buruzagiaren bizitza pribatuari buruzko xehetasunak azaltzen dira, gerrillariaren gustuak eta zaletasunak, esaterako.

1994an herri indigenen eskubideen alde altxatutako buruzagiak dioenez, ez da inoiz eroso sentitu sex appealdun pertsonaren itxura emanda: "Nola gustatuko zaizu sexu jazarpena jasatea, mesedez!", erantzun zion kazetariaren galderei. Marcosen aburuz, bere erakargarritasunaren parterik handiena "sinboloak eragiten du", ez pertsonak berak, "misterioak, maskarak, hedabideek landutako guztia erakartzen dute".

Angelina Jolierekiko "ezinezko maitasunaren" harira, aktoreak iparramerikako erreserba indigenak babesten zituela eta haren amaren jatorria herri horietako batean zegoela jakitean, kasualitatez, gertatu zela azaldu du.
Are gehiago, komandanteordeak Vicam herrixkan, Sonora Estatu mexikarrean, egin ziren Amerikako herri indigenen arteko topaketetara joateko gonbidapena helarazi zion iaz baina aktorea ez zen bertara agertu.