Wesley Snipes aktore estatubatuarrak 36 hilabeteko kartzela zigorra bete beharko du, fiskaltzak eskatzen zuen gehiena, otsailean burututako epaiketa batetan errudun suertatu ostean.

William Terrel epaile federalak zigor handiena ezartzea erabaki du, azken egunetan Denzel Washington edo Woody Harrelson bezalako izarrak bere alde agertu direna arren, hiritar on bezala kalifikatuz.

Otsailean, Orlandoko (Florida) iparmendebaldean kokaturiko Ocalako auzitegi batek epaitu zuen Snipes, 1999 eta 2004 urte bitartean zergak ez aitortzeagatik. Horrek itzurpen fiskala suposatzen du.

Fiskaltzaren arabera aktoreak 3 milioi dolarreko (1,9 milioi euro) zorra zuen, baina defentsaren ustez, hau 228.000 dolarrekoa (144.587 euro) zen soilik.

Blade trilogiaren protagonistak, 45 urtekoa, zigor arinagoa eskatu zuen (kartzelarik eta isunik gabekoa), delitu arina dela uste baitute, eta aktoreak ez zuen aurrekari penalik.

Azken egunotan, 30 lagun eta senide inguruk eskutitzak bidali dizkiote epaileari, Snipesen izaera eta portaera goraipatuz.

Snipesek ere ez zuen uste kartzelatik pasatu behar zela, eta fidantzapeko askatasuna "bidezko zigorra" litzatekeela.