Illuecako (Zaragoza) udalak Chunta Aragonesistaren (CHA) mozio bat aztertuko du. Honen arabera, Franco Generala kalea Chiki Chiki kalea izatera pasatuko litzateke, Rodolfo Chikilicuatrek konposatutako abestiaren omenez, Ruben Redondo zinegotziak jakinarazi duenez.

Mozio horretan, CHA taldeak Primo de Rivera enparantza izenaz aldatzea proposatzen du: Héroes del Silencio izena hartuko luke. Modu berean, izenik gabeko kale batek Violadores del Verso taldearen izena hartuko luke. “Ideia kale hauen izenaren kontra protesta egitea zen. Buenafuenteren saioan egon nintzen eta hurrengo egunean gertakari desatsegin asko izan ziren: mehatxuak, irainak, etab. Beste mende bateko gauzak dirudite, baina Illuecako gazteria gaur egunean bizi da”, azaldu zuen.

Horregatik, webgune bat plazaratu dute (www.myspace.com/antipapa) jendeak bere iritzia jakitera eman dezan, eta SMS bidezko iritzia eman daiteke ere, “onartzen dut” edo “ez dut onartzen” testua bidaliz. TVE eta Chikilicuatreren webguneek diotenez, Illuecako udalak beste lau zinegotziren bermea behar du. Proposamenak aurrera egiten badu, udalak enparantzaren izena inauguratzeko gonbitea luzatuko dio Chikilicuatreri.