Luke Pittar britainiarrak 1,3 milioi libera (1,6 milioi euro) irabazi zituen Britainia Handiko Loteria Nazionalean. Lana utzi ondoren, McDonaldera itzultzea erabaki du lankideen falta sumatzen zuelako.

25 urteko zortedunak Emma Cox neskalagunarekin batera egiten zuen lan Cardiffeko (Gales) jatetxe batean 2006ko uztailean aipatu saria egokitu zitzaionean.

Orduan, dirudun berriek, uniformeak zintzilikatu eta 3 urteko Chloe alabarekin bizitzaz gozatzea erabaki zuten.

Ezkontza ikusgarria ospatu zuen bikoteak eta luxuzko oporraldia egin zuten Kanariar Uharteetan (Espainiako Estatua).

Hala ere, dirudun sentimenduaren berritasuna 21 hilabeteren buruan desagertu da eta Lukek McDonaldera itzultzea erabaki du lankideen falta sumatzen zuelako.

Zortedun xelebreak 5,85 libera (7,5 euro) kobratzen ditu orduko jatetxean.

Emmak gizona babesten du erabat: "Ulertu egiten dut. Biok gozatzen genuen McDonaldean lanean eta oraindik lagun onak ditugu han".