Txinako Joko Olinpikoak direla eta, Pekineko agintariek jokamolde ona izan dezaten eskatu diete poliziei. "Mesedez", "egun on" edo "eskerrik asko" modukoak esatera behartzen ditu agintarien azken eskaerak.

Poliziek gidari bati esan beharko dioten lehen gauza "egun on" izango da. Geroago, "trafiko arauak urratu dituzu, gidatzeko baimena emadazu, mesedez" bezalako berbak esatera behartuta egongo dira.

Horretaz gain, poliziek euren lana amaitzerakoan "eskerrik asko zure laguntzagatik" edo "mesedez, trafiko arauak bete itzazu", esan beharko dute.

Agintariek adierazi duten arabera, hiri guztian zehar ikuskariak egongo dira poliziak arau berriak betetzen ari direla egiaztatzeko. Arau horiek errespetatzen ez dituztenak lana galtzeko arriskuan egongo dira.

Poliziak ez dira arau mota hauek bete behar dituzten bakarrak. Taxi-gidariei ere modu honetako arau ugari ezarri dizkiete. Taxian erretzea, jatea edo lo egitea debekatua dute. Ingelesa ikastea eta euren taxietan usain txarrik ez izatea ere eskatu diete.