'Pipas Facundo' enpresa ezaguna izututa agertu da Palentziako Udalak azalak lurrera botatzea debekatu nahi duela jakin eta gero.

Vicente Villagra 'Pipas Facundo' enpresa palentziarraren kontseilari ordezkariak esan du enpresari gisa ulertzen duela "hiriko garbiketan aurrezteko nahia" baina pipa-enpresako arduradun gisa, oso kezkagarritzat jo du "kalean pipak jateko ohituraren kontra joatea".

Palentziako Udalak, izan ere, etorkizunean debeku hori sartu nahi du garbiketaren inguruko arauetan.

Villagrak adibide bat mahai gaineratuz defendatu du negozioa eta Zamorako Udalak, esate baterako, "kalean pipak jatea debekatu ordez", Aste Santuko prozesioetan paperezko poltsak banatzen dituela jendearen artean azaldu du: "penitenteak oinutsik joaten dira eta pipa azalekin minik hartu ez dezaten egiten dute hori. Harrigarria izaten da zer nolako sintonia egoten den danborren eta pipen kliken artean, gainera" azaldu du.

Hala, 'Pipas Facundo' enpresak esan du prest dagoela Palentziako Udalarekin lankidetzen aritzeko, horrelako poltsak kaleratzeko, baina azalen bat lurrera erortzen bada…" lasai egon daitezela, biodegradableak diren eta inolako kalterik egiten ez duten girasol pipa azalak besterik ez dira eta" garbi utzi nahi izan du.

"Erabat konbentzituta gaude pipak jatea ona dela, elikagai osasungarria baita eta gaztediak boteiloia nahiz droga kontsumoa baino askoz ere hobea du ohitura hori" gaineratu du pipa enpresako arduradunak.