Frantziako presidentea eskua eman nahi izan ez zion herritar bat iraintzen agertzen den bideoa arrakasta itzela izaten ari da Interneten, milaka bisita izan ditu eta beste hainbeste komentario sortzen ari da internauten artean.

Larunbatean gertatu zen guztia, Sarkozy Nekazaritzaren Azokara joan eta bertako dendariei bostekoa ematen ari zela.

Adin nagusiko gizon batek uko egin zion presidentearen eskua estutzeari eta "ez nazazu ukitu, zikindu egingo nauzu eta" bota zion. Lasaitasuna galdu gabe, eta irribarrea ahoan, "bada, orduan, alde egin ezazu" erantzun zion lehenik Sarkozyk eta "babo gizarajoa" deitu zion ondoren, bisitarekin aurrera jarraitu aurretik.

Esaldia eslogan publiko bihur daiteke eta kamiseta nahiz abestitan amaitu, izaten ari den oihartzunarekin.

Grabazioaren egilea Stephene Puccini 30 urteko kazetari bat da. Puccinik ia konturatu gabe grabatu zuen eszena. "Izugarrizko hotsa zegoen" kontatu du berak, eta hori dela eta, irudiak hartu eta handik ordu batzuetara ikusi zituenean jabetu zen gertatuaz.

Bideoa <em>Le Parisien</em> egunkariari uztea erabaki zuen orduan, eta egunkari horren web orriak 650.000 bisita zituen igande arratsaldean, normalean baino askoz ere gehiago.

Interneten, izan ere, gertatuari besterik ez da hitz egiten oraintxe, foro askotan.