Hego Koreako konpainia batek iragarri duenez, duela 18 hilabete hil zen pitbull bat klonatzeko enkargua jaso du, lehen aldiz.

Kaliforniako emakume batek diru kopuru hori ordainduko dio RNL Bio enpresari, bere maskotaren erreplika lortzearren. Izan ere, oso harreman estua omen zuen bere txakurrarekin, beste txakur batek eraso egin eta bizitza salbatu zionetik.

Animaliari hil aurretik belarritik hartu zioten ehun baten bidez egingo du operazioa Seulgo Unibertsitate Nazionaleko talde batek, 2005ean -helburu komertzialik gabe- "Snuppy" lehen txakur klonatua lortu zuen talde berberak.

RNL Biok adierazi du lehen aldia dela txakur bat helburu komertzialez klonatuko dena, baina azkena ez izatea espero dute. Etorkizunean ehunka eskari jaso nahi lituzkete; tartean, lehergaiak eta drogak atzematen bereziak diren txakurren klonazio eskariak.

"Mendebaldeko herrialdeetan jende asko dago euren txakurrak klonatu nahi dituztenak, prezioa horren altua izan arren" esan du Ra Jeong-chan zuzendariak eta laster prezio horiek erdira edo 50.000 dolarretaraino murriztuko direla ere iragarri du, "klonazioa industria bihurtzen denean".