Maiteminduen egunaren atarian, Txileko bikote batek Shakespeare idazlearen Romeo eta Julieta pertsonaien ezbeharra bizi izan dute.

Jorge Nuñez (18 urte) eta Maria Vidal (25 urte) festa batetik autoan zetozen, eta, dirudienez, mutila gehiegi edanda zihoan. Tamalez, Jorgek autoaren kontrola galdu zuen eta irauli egin zen. Jasandako talkagatik bikotea konorte barik geratu zen autoaren barruan.

Geroago, Jorge esnatu egin zen eta bere neska hilik zegoela pentsatzean, Romeoren zoritxarreko amaiera irudikatu zuen; izan ere, autoan zeukan soka bat hartu eta zuhaitz batean urkatu zen.

Neska iratzarri zenean bere mutila autotik jaurtikia izan zela pentsatu zuen eta lagun batzuk deitu zituen laguntza eske.

Nolanahi ere, XXI mendeko Romeo eta Julietaren istorio honek zorioneko amaiera izan du; izan ere, lagunak heldu zirenean Jorge oraindik bizirik zegoela atzeman zuten. Hori dela eta, bi gazteak ospitalera eraman zituzten eta, azkenik, bertan igaroko dute Maiteminduen Eguna.