SkyEurope eta Match.com enpresek San Valentin ondoreneko astebururakoa, otsailaren 16rako, antolatu dute maitasun ekimen berezia.

SkyDate izeneko ekimen berezia ez da berria. Iaz, ekainaren 27an Brusela eta Viena lotuz antolatu zuen bikotea aurkitzeko hegaldi hori SkyEurope enpresak baina aurten bikotea aurkitzen laguntzen duen Match.com enpresaren laguntza izango du. Horrek bere webguneko 30 erabiltzaileri ekimen honetan parte hartzeko aukera emango die.

Euren "laranja erdia" 10.000 metroko altueran aurkitu nahi dutenek 140 euro ordaindu beharko dituzte. Prezio horretan sartuta egongo dira Vienarako joan-etorria, lau izarretako hotel batean gaua igarotzea, Austriako hiriburutik ibilbide turistikoa bat egitea eta hiriko lokal ezagun batean festa egitea.

Behin hegazkinean, neskek eserleku zenbaki bat izango dute eta mutilak euren SkyDate txarteleko lehen zenbakiak zehazten duen eserlekuan eseriko dira. Hegaldia abian dela, abisua jasotzen dutenean, 10 pertsona ezberdinekin hitz egingo dute, 5 minutuz bakoitzarekin.